Matthew 16

Ɓai Ye Tuze

1Nwyiho yi a Farisiyi ɓedo na Sadukiyi ɓa ɓe ntu ge ɓa mwi Yesu, ngye shi wo gna ge wo zhin Masihu nu nyi, wa wu ɓa atuze nshe bmana.

2– 3Wa dna ɓa ɓegbe ge, “Fye zhin a ɓeyekpeyi nu eshe bmana nya, nshe wu n byei-byei yi, ko wu ge efye ɓa gyi agya ʼɓo bmiya, nshe wu n byei-byei yi, n labmi yi ko wu ge aɓo ta dagma n wyiyi yi m.” Ama fye ta mi fya ba atuze anyi nya m.

4Abye nukwoyi, atna gaiciya ga yi, fye nya atuze ɓo n she bmana, a ta wu fye atuze do n du Yunana nya n. Yesu a la wo nya ka, wa fa ɓa zhi.

5Ɓa piya kpe n kma, abara paje ge, gye yi ku zamwi to yi ɓe n nyagyi shi m.

6Yesu wa gna ɓa ge, “Fye zhin peceiye n Yisti a Farisiyi nya, n na Sadukiyi yi.”

7Ɓa gye ge wo da lo nu ge shi ɓa zamwi to ɓai ɓe n nyagyi yi shi nun.

8Yesu wa kukpe ɓo ɓa zhin nubo cei, wa gna ɓa, “Efye, aza a gaiciya ga gba-gbai da, Kniyi nu zhin fyei gna fyehin tukwo gna-gna ge, fye to nyagyi shi lo ma? 9Fye ta shan ganyi kpe n? Fye ta pa lo aza 5,000 n mi ɓo ga ɓa nyagyi n bredi yi gun atnu, nya ko ɓo ce kwa nu a cekun? 10Fye tapa aza 4,000 ɓo lon, ɓa gyi har koi ce n? 11Knihi nu ɓa zhin fya zhin nubo ge mi da nyagyi nu ɓo a? Ma je fye gna, ʼfye zhin peceiye n yisti a Farisiyi nya yi ɓedo na Sadukiyi yi.”

12Gni ɓo nu ɓa kpe ge yisti konu, wo da wu-wu nukwoyi nu ɓo na Farisiyi ɓedo na Sadukiyi wu nyi.

13Shi Yesu ɓo si Kaisariya Filibi, Wa nya wo abara ge, “Aza gna ge mi zhin nyikana?”

14Ɓa gna, “Azaho gna Yohanna batisma zhinyi, azaho ge Iliya, azoho ge Irimiya-ko anabi ho.”

15Wa nya ɓa ge, “Fyehin gna ge mi zhin nyika na?”

16Siman Bitrus wa gna ge, “Kristi Masihu, Shekwoyi Wye-wyei da Nugun.”

17Yesu wa gna wo ge, “Shekwoyi la ho tu anabarka, Siman, Yunana nugun. Ntu ge emi Dada n wo dna ʼshe nyi, wo na wu ho ɓeye, zanyikoci nu ton. 18Ho nu zhin Bitrus, kuta; n na pma ye nu miɓa mi mi Ikklisiya. Iko anapyi nya ta mi kwa zhin nasara n ko yi m. 19Miɓa ga ho mabudi Shekwoyi ɓemi nya, abokunmi doho-dohoi ha gu nanyi, a la ɓa gu ʼshe, ado n ha guya, ala ɓa guya ʼshe.”

20Wa pmi wa kun wo abara ge, ɓa to gna aza ge wo zhin Masihu nu m.

21Tunyi n sahi, Yesu wa gna Wo abara Urushelima lo ɓo pei-pei, wa wu ɓa nya ko ɓo sin wo ɓo- Wo ɓa sin wahala na Yahudawayi a tukoda ʼkun, a wu wo, ama dna na nyipyei gun ata avun, wo ɓei je wye-wyei bwa.

22Ama Bitrus wa pmi wo gni gna-gna wa gnakni wo, wa gna, “Shekwoyi sauka, aɓeye ta bwa ho lo nu m.”

23Yesu wa gna Bitrus, “La mi ka lo bwai, shetan! Ho zhin kuta bonyice nya-nu maba. Eza ɓemwi nu n ho da, Shekwoyi nya nu to m.”

24Yesu wa pmi wa gna abara ge, “Ndei zaho-zahoi ye wa vi mi, sai wa na wohin tukwo aɓo, wa la wohin zundu, wa vi mi. 25Ntuge zaho-zahoi wa shi wo wye-wyei ntu wohin tukwo ɓo, ko ɓa wo bwi. Ama eza n wa bwi wo wye-wyei ntu mi ɓo, wo ɓa je kwo bwa. 26Kni gyibai nu n za ɓa bwa ge anyi vinya ɓa ku ze wo nya, ama wa tna wye-wyei nyalo-nyalo nya? A ɓa mwi wye-wyei nyalo-nyalo nya do n kniyi ya? 27Ntuge Emi, Zanugun, ɓaɓe n ma malaikayi dna latu Emi Dada nya, miye da zaho-zahoi owa shi wa zhan ɓo wu.

28“Ɓehin-hin, azaho zhi lo ʼya n ɓa ɓei gye Mi, Mi ɓe dna Mi ʼbe mi.”